ПАТĂРЬЕЛ муниципалитет округĕн администрацийĕн çул çитмен ачасен правине хỹтĕлес енĕпе тимлекен комиссинче кун пек ĕçсене час-часах пăхса тухаççĕ. Шкулта вĕренекенсем (16 çул тултарман ачасем) водитель прависĕр е тата шлемсăр мотоциклпа е мопедпа çул çине тухса çил пек вĕçтерсе çỹренĕрен ГИБДД сотрудникĕсен аллине çакланаççĕ. Ун пек чухне йĕрке хуралçисем ашшĕ-амăшĕ ячĕпе ачине тивĕçлĕ воспитани паманшăн РФ КоАПăн 5.35 статйин 1-мĕш пайĕпе килĕшỹллĕн протокол çыраççĕ, штраф тỹлеттереççĕ. Йĕркене пăснă çак тĕслĕхшĕн пĕтĕмпех ашшĕ- амăшĕ айăплă, яваплă та. Енчен те мопедпа е мотоциклпа теветкеленсе çỹрекен ача çак вăхăтра 16 çул тултарнă пулсан административлă Кодексăн 12.7 статйин 1 пайĕпе унăн хăйĕнех саккун умĕнче явап тытма, комисси умĕнче пите хĕретме, унсăр пуçне 5 -15 пин тенкĕ таран штраф та тỹлеме тивет.

Хальхи вăхăтра Патăрьелĕнче, Шăнкăртамра, çавăн пекех ытти ялсенче те çул çитмен ачасем уйрăмах каçсерен ушкăнпа мотоциклпа е мопедпа вирхĕнтерсе çỹреççĕ. Пурнăçĕпе, сывлăхĕпе теветкеленекенсен водитель прави те çук, çул-йĕр правилипе çыхăннă ытти йĕркене те пăхăнмаççĕ. Çакăншăн чăн малтанах ашшĕ-амăшĕ яваплă! Ан манăр: ачана çамрăклах "хурçă ут" туянса пани ырă ĕç мар. Вăл çемьене тăкак çеç мар, инкек те кăтартма пултарать! Ун пек тĕслĕхсем сахал мар пулаççĕ.