Ваттисем пĕр çын сурать типсех пырать, халăх сурать кỹлĕ пулать, тенĕ. Каларăш чылай чухне пурнăç чăнлăхĕпе тỹр килет пулин те, тепĕр чухне пĕччен пуçарупа та пысăк ĕç тума пулнине те ĕненме пулать. Çакна Ишлĕ территори пайĕнчи ырă тĕслĕхпе çирĕплетсе парасшăн.

 Çак кунсенче Ишлĕ ялĕ вĕçĕнче, Ульяновкăна кайнă çĕрте ĕç шавĕ пуçланчĕ, подрядчик хăватлă техникăсемпе "Шетмĕ" кỹллине тасатма, тарăнлатма, унăн йĕри-таврашне хăтлăлатма (подрядчикĕ Д. Владимиров) пикенчĕ. Объектăн хакĕ - çур миллион тенкĕ. Чăваш Республикинче пурнăçланса пыракан асăннă программăн условийĕпе килĕшỹллĕн пуçару ĕçĕн тăкакăн пĕр пайне халăх тỹлемелле. Çак кỹлĕ те ял-йыш пая кĕнипе пурнăçланмаллаччĕ. Çапах та Ишлĕ ялĕн хисеплĕ çынни, Шупашкарта пурăнакан Геннадий Егоров проектăн халăхран пуçтармалли пайне (112 пин тенкĕ) хăй çине илсе Ишлĕсене пысăк парне турĕ. Патăрьел муниципалитет округĕн бюджетĕнчен те çавăн чухлех укçа-тенкĕ кайрĕ.

Геннадий Иванович тăван ялтан тухса кайса хулара çемйипе тĕпленни тахçанах пулин те, çуралса ỹснĕ тăрăха манмасть, тăтăшах пулăшать, ял малашлăхĕшĕн хăйĕн тỹпине хывать. Çакăншăн ял халăхĕ ăна чун-чĕререн тав тăвать. Унăн сăваплă ĕçĕсемшĕн пурнăçра пархатар курмалла пултăр, малашне те хавхаланса ĕçлеме Турă сывлăх патăр. –

Çемьере эпир ултă ача ỹснĕ. Сак тулли темелле. Çапах та пире атте-анне пурнăçра тĕрĕс воспитани панăшăн, тăванлăха упрама, тăван яла, çуралса ỹснĕ кĕтесе юратма, хак пама, пулăшма вĕрентнĕшĕн паянхи кун та тав тăватпăр. Ырă ĕç, çынна пулăшни яланах вăй-хăват парать, хавхалантарать, каялла вара темиçе хут ырăпа таврăнать ,- тет Геннадий Иванович.

Хальхи вăхăтра территори пайĕсенчи ялсенче старостăсем чылайăшĕ пысăк яваплăха туйса, халăхпа пĕр чĕлхе тупса ĕçлеççĕ. Вĕсем тавралăха тирпей-илем кỹрес, субботниксем йĕркелес, ытти пуçарусенче хастарлăх кăтартас ĕçсенче те кăтартуллă. Эпĕ те çак обществăлла тивĕçе вунă çула яхăнах пурнăçласа пыратăп. Йĕпреçри вăрман хуралĕнче тăрăшнă май, хамăн тĕп ĕçе обществăлла тивĕçĕмпе шайлаштарса пыма тăрăшатăп.

Николай АРТЕМЬЕВ, Ишлĕ ял старости