Куçа илĕртеççĕ кашнинче вĕсем ЯЛСЕНЧЕ çỹп-çап контейнерĕсем тулли пулни, вĕсен таврашĕнче тирпейсĕрлĕх хуçаланни пирки çырсах тăратпăр, сăн ỹкерчĕксемпе кăларнă тĕслĕх- сем те пур. Тасалăх хамăртан та нумай килет çав. Ăна валли укçа-тенкĕ те кирлĕ мар, вăхăт çеç тупмалла. Çакна тĕслĕхпе те çирĕплетме пулать. Пăлакассинчи Луговая урамри ешчĕксем айккипе Валентинăпа Светлана Сурковăсем, Галина Комарова тĕрлĕ чечек лартса тухнă. Никам хушмасăрах, кам та пулин килсе пулăшасса кĕтмесĕрех пурнăçланă. Хальхи вăхăтра кунта тюльпансем, ириссем куçа илĕртеççĕ. Каярах вара флоксăсем, лилисем, хризантемăсем пĕрин хыççăн тепри илемĕпе савăнтарĕç.