ЮЛАШКИ çулсенче ялсенче лашасен шучĕ чакрĕ. Чĕлхесĕр янаварсене тĕрлĕрен "хурçă ут" улăштарчĕ темелле. Вăхăтĕнче Чăваш Ишекре те урхамахсем ял илемĕ, ĕç вăйĕ шутланнă-ха. Халĕ ытти çĕрти пекех çак ялта та пĕр çемьесĕр пуçне урăх ăна усракан та çук. Леонид Антонов хастар вара паянхи кун та кил хуçалăхĕнчи ĕçсенче лашапах усă курать-ха. Йышлă выльăх-чĕрлĕх, кайăк-кĕшĕк усракан мăшăр выльăх апатне те унпах турттарать. Вăл çеç те мар. Çăварни эрнинче ĕлĕкхи йăла-йĕркепе урхамаха капăрлатса çемйипе, ачисемпе, мăнукĕсемпе ял йĕри-тавра, урамсемпе катаччи чупасси те ырă йăларах кил хуçин. Типĕ кĕрес умĕн шăпах çапла савăнтарнă та ашшĕ, аслашшĕ ачисемпе мăнукĕсене.