2023 ÇУЛХИ декабрь муниципалитет округĕн истори страницине хăйне евĕр хурлăхлă пулăмпа çырăнса юлать. Кăшт маларах çеç Кĕçĕн Патăрьелĕнче пурăнакан хисеплĕ вăрçă ветеранĕ, артиллери полкĕнчи батальонра рядовой салтак пулнă Вера Николаевна Тихонова 100 çул тултарнă хыççăн темиçе кунтанах пиртен ĕмĕрлĕх уйрăлса кайрĕ. Çак кунсенче каллех тепĕр çухату пулчĕ. Сăкăтра çуралса ỹснĕ Мария Николаевна Никифорова вăрçă ветеранĕпе те тăванĕсем, çывăх çыннисем ĕмĕрлĕхех сыв пуллашрĕç. Сăр тăрăхĕнчи хỹтĕлев чиккине тума хутшăннă, вăрçăра çыхăну начальникĕ пулнă ветеран кăçалхи ноябрьте 101 çул тултарнă пулнă.