ПАТĂРЬЕЛ муниципалитет округĕнчи тĕп больница "Сывлăх" наци проекчĕпе килĕшỹллĕн сывлăх сыхлавĕн пуçламăш звенине модернизацилес, сиплев учрежденине ку чухнехи оборудованисемпе пуянлатас тĕллевпе ĕçлесе пынипе пĕрлех çамрăк специалистсене ĕçе явăçтарассипе те чылай тимлет. Çак кунсенче çеç "Земство тухтăрĕ" патшалăх программипе Юхмапа Пăла тăрăхĕнчи тĕп сиплев учрежденине харăсах виçĕ специалист - Александр Елкин, Дмитрий Кузнецов, Дмитрий Муллин - анестезиолог-реаниматологсем ĕçе пикеннĕ. Çамрăк тухтăрсен тăван тăрăхра хăйсен специальноçĕпе ĕçлес кăмăлĕсем пысăк, хальхи вăхăтра вĕсен çумне пуян опытлă наставниксене те çирĕплетнĕ. Коллектив çĕнĕ тухтăрсене алхапăл йышăннă.