ИРТНĔ шăматкун суту-илỹ ĕçченĕсемпе ветеранĕсем хăйсен професси уявне паллă турĕç. Çавна май Константин Иванов ячĕллĕ Чăваш драма театрĕнче республикăри "Чăваш Енри суту-илỹ-2023" конкурс çĕнтерỹçисене те чысланă.

Патăрьел муниципалитет округĕнчи Решид Санзяпов фермер хуçалăхĕ çак конкурсра харăсах икĕ енĕпе пĕрремĕш вырăн йышăннă: "Стационарлă мар чи лайăх суту-илỹ объекчĕ" тата "Вырăнта кăларнă продукцисене сутас тĕлĕшпе чи лайăх магазин" номинацисемпе. Çавăн пекех "Чи лайăх апат-çимĕç магазинĕ" номинацире Гульнара Шамсутдинова фермер хуçалăхĕ ("Халяль" суту-илỹ çурчĕ) иккĕмĕш вырăна тухнă.

"Чи лайăх мобильлĕ суту-илỹ объекчĕ" номинацире вара Патăрьел райпоне иккĕмĕш вырăн йышăннă ятпа саламланă. Çакна та палăртма кăмăллă. Юлашки çулсенче Юхмапа Пăла тăрăхĕнче суту-илỹ çурчĕсен йышĕ хушăнсах пырать. Вырăнта кăларакан продукцисене хамăр лавккасенчех сутнипе халăх та кăмăллă.