ÇАК кунсенче Хусан ипподромĕнче юртă лашасен Раççей шайĕнчи ăмăртăвĕ иртнĕ. Унта Тутарстанран, Челябинск, Самара, Мускав, Новгород облаçĕсенчен тата Чăваш Республикинчен чи вăйлă чупакан урхамахсем (мĕн пурĕ 17) старта тăнă. Пысăк ăмăртура тăваттăмĕш ушкăнпа Тикеш ялĕнчи Алексей Краснов тытса пыракан "Уникс" çамрăк урхамах 1600 метрлă дистанцире начар мар кăтартупа палăрнă, финиша иккĕмĕш кĕнĕ. Алексей Егоровича чылай чухне ăмăртура "Победитель" лашипе ăнăçусем тунине пĕлетпĕр. Çак чĕлхесĕр янаварпах вăл регион, Раççей шайĕнчи ăмăртусенче те пĕрре мар палăрнă. Шанас килет, çамрăк урхамаха та спорт ветеранĕ пысăк тупăшусене хутшăнма тивĕçлипе хатĕрлесе çитерĕ.