ТЕПĔР чухне пуçтах водительсем ял-хула варринче те автомобиль чỹречине уçса ăпăр-тапăра ывăтса, вĕçтерсе хăвараççĕ. Малашне çул çинче йĕркене пăсакансене видеокамера тĕлне çаклансан çăмăллăх пулмĕ.

2023 çултан РФ административлă Кодексне улшăнусем кĕртнĕ. Унпа килĕшỹллĕн автомашина кантăкне антарса çỹп-çапа пăрахса хăваракан ахаль çынсен 10-15 пин тенкĕ, должноçрисен 20-30 пин тенкĕ, юридика сăпатĕнчисен вара 30-50 пин тенкĕ штраф тỹлеме тивĕ. Йывăр тиевлĕ автомобиль, юрпа çỹрекен транспорт тата трактор водителĕсен çак йĕркене пăссан айăплав тỹлевĕ тата пысăкрах, 80 пин тенкĕ таранах! Çавăнпа та çул-йĕр правилине, административлă йĕркене çирĕп пăхăнни çынсене çемье бюджетне самаях перекетлеме пулăшĕ. Вăл çеç те мар-ха. Çак саккун тирпей-илеме пăхăнассипе, çут çанталăка сыхлассипе те çыхăннă.