ÇЫНРАН кивçен укçа илсен çеç мар, налука е штрафа вăхăтра тỹлемесĕр парăма кĕрсен те парасси хĕн. Ку тĕлĕшпе хура списока лексен йĕрке хуралĕн сотрудникĕсен аллине çакланасса кĕтсех тăр. Паян пулмасан ыран е кăшт каярах "çылăхна" каçарттармах тивет. РФ ШĔМĕн районсем хушшинчи "Батыревский" уйрăмĕн ГИБДД пайĕн сотрудникĕсемпе пĕрле йĕркеленĕ республикăри "Должник" операци шăпах çул-йĕр правилине пăхăнмасăр, ỹсĕрле руль умне ларнăран е ытти сăлтавпа йĕрке хуралĕн сотрудникĕсен аллине çакланса штраф укçине вăхăтра тỹлеменнисемпе çыхăннă. Çак эрне тăршшĕпех (ноябрĕн 21-25-мĕшĕсенче) налук службин тата полици сотрудникĕсем пĕрлехи рейдсенче шăпах вĕсене çул çинче чарсах тỹлеттернĕ.