УРАМРА хура кĕркунне палли темелле: йывăçсем ылтăн тумне улăштарчĕç, хĕвел те тарса пытанчĕ, ирхине тата каçхине çанталăк та сулхăнлатрĕ, кунсем кĕскелсе пыни те самаях сисĕнет... Хĕл илемне кỹрекен шурă юр хăйĕн "пуставне" сариччен кĕрхи каçсем пушшех те тĕксĕм. Çавăнпа та РФ ШĔМĕн районсем хушшинчи "Батыревский" уйрăмĕн ГИБДД пайĕн начальникĕ Алексей Мальцев хальхи вăхăтра каçхине пурне те тротуарпа çеç çỹремеллине, аслă çул хĕррипе утма юраманнине, çав вăхăтрах тумтир çинче çутта хирĕç çутатакан хатĕрсем çыпăçтармаллине асăрхаттарать. Хăш-пĕр водитель çуллахи ураписене хĕллехипе улăштарма васкаманни те пур-ха. Çакă каллех çул çинчи хăрушлăхпа çыхăннă.