ПУРНĂÇ çĕнелсе, ырăлăх çумне ырăлăх хушăнса, культура шайĕ ỹссе пынă май парикмахерсем йышланса, илемлĕх пỹлĕмĕсем хушăнсах пыраççĕ. Хальхи вăхăтра Патăрьелĕнче çеç парикмахерсен 20 ытла салонĕ çамрăксене те, ваттисене те йышăнма хатĕр. Паян хăйсен ĕçне чунтан парăнса професси ăсталăхне ỹстерсе пыракан специалистсене чăн-чăн искусство çынни теме пулать. Вĕсем хушшинче хĕрарăмсем çеç те мар. Акă, Виталий Калькин парикмахер алла хачăпа расческа тытни 30 çул ытла! Альбина Емильева та юратнă ĕçĕнче нумай çул тăрăшса ят-хисеп çĕнсе илнĕ. Ăста парикмахерсене Патăрьел район администрацийĕн пуçлăхĕ Рудольф Селиванов професси уявĕпе саламласа "Патăрьел районне - 95 çул" медальпе чыслани те çакна тепĕр хут çирĕплетет.