КĔРКУННЕ çывхарни кашни утăмра сисĕнет. Çулçăсем те сарăхма пуçларĕç, хирсем те пушанса пыраççĕ. Хушма хуçалăхпа пурăнакансем те пахча çимĕçе пухса кĕртме пикенчĕç. Хальхи вăхăтра ял çыннисем çĕр улми кăлараççĕ. Тухăçĕ кăçал начар мар, çакă савăнтарать. Чылай вăхăт çумăр çумарĕ пулсан та тымар çимĕç аванах çитĕннĕ. Лайăххипе пĕрлех начарри те юнашарах çỹрет çав. "Иккĕмĕш çăкăра" пуçтарса илме пикеннĕренпе унăн авăрне çунтарма тытăнчĕç, çавна май таврана тĕтĕм шăрши сарăлать. Районти пушар хуралĕнче ĕçлекенсем çанталăк шăрăх тăнăран çурт çывăхĕнче вут чĕртмелле маррине тепĕр хут аса илтереççĕ.