ÇАНТАЛĂК улшăннă вăхăтра çулсеренех ОРВИ, грипп чирĕ вăйлăрах сарăлать. Унсăр пуçне хальхи вăхăтра коронавирус çынсен сывлăхне хавшатни те пăшăрхантарать. Паян районти тĕп больницăра çак амакран выртса сипленме вырăн та çук-мĕн. Çавăнпа та чылайăшĕн врач сĕнĕвĕсене килтех çирĕп пурнăçлама, йĕркене пăхăнма тивет. Усал чиртен хỹтĕленмелли чи шанчăклă мел - вакцина яртарни. Çакна чылайăшĕ ăнланса хăйсен сывлăхне упраççĕ. Çак кунсенче çеç Патăрьелĕнче пурăнакан журналист-ветеран, районти Общество канашĕн членĕ Николай Ларионов коронавирусран прививка тутарнă. Район пурнăçне хастар хутшăнакан ĕç ветеранĕ çак утăма туни уншăн кирлех тесе хак парать, хăйне лайăх туять.