ШĂШИ пĕчĕк пулсан та сехрене те хăпартать, сиенне те çителĕклех кăтартать. Вĕсене пĕтерес тесе кил хуçалăхра ятарлă наркăмăшсем те паратпăр, клей те сĕретпĕр, пĕрех пире парăнасшăн мар. Сăмах май, пĕр шăши пĕрре çăвăрланă чухне 2-13 çура таран тăвать. Пĕчĕкскерсем 3-4 эрнере ỹссе çитсе хăйсем йăх пама пуçлаççĕ. Ĕненетĕр-и, çук-и, анчах çак кăшлакан чĕр чун çулталăкне 5-9 хутчен çăвăрлать.

Россельхозцентр специалисчĕсем кăçал республикăри хирсенче те шăшисем пĕлтĕрхинчен 1,5 хут нумайраххине палăртаççĕ: пĕр гектарта вăтамран 70,9 шăтăк тупса палăртнă. Вĕсем нумай çул ỹсекен курăксем тата кĕрхи культурăсем çитĕнекен уйсенче уйрăмах чылай иккен. Вăхăтра тивĕçлĕ йышăну тусан çеç пулас тухăçа упраса хăварма май пур.