Помидора, хăяра чир-чĕр хăвăрт ерет, çавăнпа хăш-пĕр пахчаçă лавккаран туяннă препаратпа усă курать. Тен, çимĕçе наркăмăшлантармалла мар? Ăна ачасем те çиеççĕ-çке-ха. Акă, çĕпре фитофторăран тата кăмпа чирĕсенчен хăтăлма пулăшать.

Ăна çапла хатĕрлемелле: 3 литр шыва 38 градус таран ăшăтмалла (анчах ытларах мар, унсăрăн çĕпре пĕтет), 10 апат кашăкĕ сахăр, 10 грамм типĕ çĕпре хушмалла. Анчах астăвăр: 3 литртан пысăкрах савăт илмелле, мĕншĕн тесен çĕпре 2-2,5 хут хăпарать.

Çак хутăша 4-10 сехетлĕхе лартмалла, хушăран пăтратмалла. Ăна ирхине хатĕрлесен лайăхрах. 3 литр хутăша 7 литр шыва ярса пăтратмалла. Каçхине, шăрăх пĕтсен, çак шĕвекепе помидорпа хăяра шăвармалла. Хăяра ку шĕвекпе 10-12 кунра пĕр хутчен шăвармалла. Ытти пахча çимĕçе те çак мелпех шăварма юрать.

Çак шĕвекпе ÿсен-тăрана сирпĕтсен вăл фитофторозпа чирлемĕ. Çĕпрери усăллă кăмпасем сиенлисене пĕтереççĕ. Ку процедурăна икĕ хутчен тумалла. Икĕ-виçĕ кунтанах ÿсен-тăран çулçи лайăхланнине куратăр. Çимĕçĕ те тухăçлăрах пулĕ.