ÇУ уйăхĕн малтанхи кунĕсем ăшăпа савăнтарчĕç пулин те, çанталăка сăнакансем малашне сивĕтесси пирки асăрхаттараççĕ. Ваттисем калашле çуллахи Микуласăр ăшăтсах каймĕ. Православи календарĕпе вăл майăн 22-мĕшĕнче пулать. Анчах кирек мĕнле пулсан та граждансен пушар хăрушсăрлăх йĕркисене çирĕп пăхăнма тивет. Ку тĕлĕшпе Чăваш Республикин Министрсен Кабинечĕн постановленийĕ те вăйра. Йĕркене пăхăнман граждансене пысăк штрафсем панине те аса илтересшĕн. Районти пушар надзорĕн начальникĕ Андрей Тукмаков хаçат редакцине пĕлтернĕ тăрăх, çулталăк пуçланнăранпа районта 23 пушара шута илнĕ. Çак кунсенче çеç Турханта пĕччен пурăнакан карчăкăн çурчĕ-йĕрĕ тăр кăнтăрлах çунса кĕлленнĕ. Çак ял тăрăхĕнче кăçал иккĕмĕш пушар тухнă.