ЯЛ ХУÇАЛĂХ продукцийĕсем кăçал питĕ йỹнелсе кайрĕç тата туянакансем те çукрах. Халăх халь вĕсене ниçта хурайманнипе выльăхсене çитерет, анчах пурте юрăхлă-и-ха? Çакă та вĕсене пăшăрхантарать. Выльăх-чĕрлĕх чирĕсемпе кĕрешекен станци начальникĕпе П. Ефимовпа, район администрацийĕн экономика, ял хуçалăх, çĕр тата пурлăх хутшăнăвĕсен пайĕн специалисчĕпе З. Телегинапа тата ытти специалистсемпе те телефонпа çыхăнтăмăр. Вĕсем хĕрлĕ чĕкĕнтĕре ĕнесемпе вăкăрсене çитерме юранине, анчах 3-4 килограмран ытлашши памалла маррине пĕлтерчĕç. Рациона кĕртсен вăл кулленех пулмалла. Сăвакан ĕнесен сĕчĕ хĕрлĕ чĕкĕнтĕр çинĕ хыççăн тĕсĕ те кăштах тĕксĕмленет.

Çĕр улмие пĕçерсе çитерекенсен те асăрхануллăрах пулмалла. "Иккĕмĕш çăкăра" пиçнĕ хыççăн пĕр талăк çурăран ытлашши тăратма юрамасть, унсăрăн унта наркăмăшлă япаласем пухăнма пуçлаççĕ. Шывне тăкмасан пушшех те хăрушлăх кăларать. Кишĕрте каротин нумай, вăл выльăхсемшĕн питĕ усăллă, анчах татах виçеллĕ памалла.