Шупашкарта коопераци институтĕнче РФ Центросоюзĕ тата Чăваш Республикин Правительстви пĕрле йĕркеленĕ «Çĕнĕ коопераци — пĕчĕк хуласемпе ялсен аталанăвĕн никĕсĕ» пленарлă канашлу иртнĕ. Ларăва РФ Правительствин, РФ Патшалăх Думин, ĕç тăвакан влаç органĕсен представителĕсем, регионсен потребсоюз ертÿçисем хутшăннă. Канашлура пĕчĕк ялсемпе хуласенче социаллă тата мобильлĕ инфратытăма аталантарассине, халăхран пахча çимĕç, улма-çырла туянассине централизацилессине, нумай функциллĕ курттăм тавар туянакан тата сутакан центрсем туса хурассине сÿтсе явнă. РФ Центросоюз Канашĕн председателĕ Дмитрий Зубов çĕршыври потребкоопераци ĕç-хĕлĕн кăтартăвĕсем çинчен каласа кăтартнă, малашлăх тĕллевĕсене палăртнă. Чăваш Ен Пуçлăхĕ Михаил Игнатьев республикăра влаç органĕсен тата потребительсен кооперацийĕсен предприятийĕсен пĕрлехи ĕçĕпе паллаштарнă.