КОММУНАЛЛĂ хытă каяшсене е урăхла каласан кил-çуртран тухакан кирлĕ мар япаласене пухмалли контейнерсем çук чухне пĕр тĕрлĕ нушаччĕ — çырма-çатрана, çул хĕррипе лартнă посадкăсене, çын питех çÿремен вырăнсене кая-кая пăрахатчĕç. Ятарлă ещчĕксем вырнаçтарнă хыççăн йăлтах йĕркеленсе каяссăн туйăнатчĕ. Туйăннă кăна... Халĕ контейнерсене çÿп-çап кăна мар, çум курăк та, сĕтел-пукан та, автомашина кустăрмисене тата ыттисене те тухса хураççĕ. Курсан тĕлĕнсе каймалла. Çынсен ăнланулăхĕ çитменни инкек патне те илсе пыма пултарать иккен.

Иртнĕ эрнере Патăрьелĕнчи Овражная урамри çÿп-çап пухмалли контейнер çуннă. Вут хăйне хăй тухманни паллă, апла пулсан кам та пулсан лайăх сÿнтермен кĕл е урăх япала унта пăрахнă. Юрать-ха никам та нуша курман, нимĕн те сиенленмен (контейнера шута хумасан).