1941 ÇУЛХИ июнĕн 22-мĕшĕ Раççей халăхĕн чĕрине ĕмĕрлĕхех кĕрсе юлнă. Шăпах çак кун фашистла Германи ирхи 4 сехетре Совет Союзне тапăннă. Тăватă çула яхăн тăсăлнă вăрçăра 27 млн ытла çыннăн пурнăçĕ вăхăтсăр татăлнă.

Тăван çĕршывăн Аслă вăрçинче паттăрла пуç хунă салтаксене асăнса Раççейĕпех июнĕн 10-22-мĕшĕсенче «Асăну çурти» онлайн-акци йĕркеленĕ. Кашни çын «деньпамяти.рф» сайта кĕрсе виртуаллă çурта çутма пултарать.

Сайтра çавăн пекех «Июнĕн 22-мĕшĕ историсенче» уйрăм пур, унта вăрçă участникĕсем, блокадниксем, концлагерьсенче пулнисем хăйсен аса илĕвĕсемпе паллаштараççĕ.

2004 çултанпа июнĕн 22-мĕшĕнче çынсем урама тухса та мирлĕ тÿпешĕн фашистсемпе çапăçнă кашни салтака сума суса çуртасем çутаççĕ, пĕр самант шăп тăраççĕ. Ялсенче пурăнакансем кăçал та акцие хастар хутшăнасса шанас килет.