МĂСĂЛЬМАН тĕнне ĕненекенсем майăн 27-мĕшĕнче çутă та пысăк уявсенчен пĕрне — Курбан-Байрама — паллă турĕç. Çак кун арçынсем ирех мечете кайнинчен пуçланать, вĕсем таврăнсан пĕр-пĕрин патне хăнана çÿреççĕ.

Чи пĕлтерĕшли — выльăх, сурăх е така, пусни. Какая виçĕ пая пайлаççĕ: пĕрремĕшĕ — йывăрлăхра пурăнакансене, иккĕмĕшĕ — тăвансемпе хăнасене сăйлама, виççĕмĕшĕ çемье валли. Кашнийĕн аш-какайран пĕçернĕ апата ас тивмеллех. Çавăн пекех масар çине çывăх çыннисем патне каяççĕ, пĕр-пĕринчен начар ĕçсемшĕн каçару ыйтаççĕ.

Виçĕ куна тăсăлакан Курбан-Байрам — çывăх çынсемшĕн тăрăшмалли, çемьене пĕрлештерекен, Çÿлти хуçана пăхăннине кăтартакан уяв. Кашни килтех хăнасене хапăлласа кĕтсе илеççĕ, сĕтел тутлă çимĕçсемпе пуян.