Шупашкар хулинчи 130-мĕш ача садĕнче «Чăваш пÿрчĕ» ятлă культура еткерлĕхĕн тĕлĕнмелле центрĕ ĕçлет. Ку — хулара официаллă майпа краеведени статусне илнĕ пĕртен-пĕр ача-пăча музейĕ. 2018 çулта уçăлнăскер ачасем, вĕрентекенсем тата хăнасем валли чăн-чăн илĕртÿ вырăнне çаврăнчĕ.

Экспозицире 200 ытла экспонат пухăннă, йăлари япаласем, наци тумтирĕ, савăт-сапа. Кунта ачасем тăван ен историйĕпе тата чăвашсен пурнăç йĕркипе кăна мар, аслашшĕ-асламăш йăлисене хисеплеме те вĕренеççĕ. Чăваш культурин эрнинче çулсерен «Асанне арчи» ятлă акци иртет, унта кивĕ япаласем пухас ĕçе ачасен ашшĕ-амăшĕ, педагогсем, туссем тата тăвансем хастар хутшăнаççĕ. Сăмахран, ача сачĕн пуçлăхĕн Ружена Семеновăн амăшĕ — Мария Александровна Ярушкина Патăрьел муниципалитет округне кĕрекен Çăл Атăк ялĕнчен — 70 çулхи алăпа çĕленĕ 10 ытла кĕпе парса янă. Çак япаласем экспозици пайне кĕреççĕ тата чăваш тумтирне тĕслĕх вырăнне кăтартаççĕ.

Музейра тата час-часах мастер-классем иртеççĕ, унта ачасем чăваш тĕррин ÿнерне тата ытти халăх ремеслине вĕренеççĕ. Çак занятисем пултаруллăха, ал-ура ăсталăхне аталантараççĕ, чи кирли — тăван культурăна юратма вĕрентеççĕ.

«Чăваш пÿрчĕ» программăра хутшăннă кашни ача хăйне пысăк та туслă çемьен пайĕ пек туйтăр! Вĕсене пĕрле культура тата истори пĕрлештерет.

Ружена СЕМЕНОВА