ЮР ирĕлет, тасамарлăх ытларах та ытларах куçа тирĕнет. Çырмасемпе юхан шывсем çывăхĕнче е тата ытти вăрттăнрах вырăнсенче типнĕ, çĕрнĕ çевоксен куписем те курăнкалама пуçларĕç. Хăш-пĕр çынсем пĕр именмесĕрех Патăрьелсен «бренчĕ» шутланакан пахча çимĕç каяшне çын çÿрекен вырăнах тăкаççĕ.

Ачасемпе мăнуксем таса сывлăшпа сывлаччăр, вăрăм ĕмĕрлĕ пулччăр тесен Çĕр-аннемĕре упрассишĕн, ăна варалас марришĕн пĕрлехи вăйпа тăрăшмалла. Апрелĕн 1-мĕшĕнчен пуçласа майăн 25-мĕшĕччен округра экологи уйăхлăхĕ иртет. Çак тапхăрта тăван тавралăха тасатса тирпейлеме субботниксем ирттерме, 1000 яхăн йывăç-тĕм лартма, «Астăвăм сачĕ», «Раççейри шыв» акцисем йĕркелеме палăртнă. Вĕсенче кашни территори пайĕхастарлăх кăтартмалла.