ШУПАШКАРТИ «Пехет» агромаркет Чăваш Енре пурăнакансемпе хăнасене хăйĕн патне ытларах та ытларах туртать. Кунта ял хуçалăх предприятийĕсемпе фермер хуçалăхĕсем туса илекен экологи енчен таса продукцисене сутнипе пĕрлех тавракурăма анлăлатма, йăла-йĕркепе паллашма, кирлĕ сĕнÿ илме, эстрада артисчĕсен хаваслă юррисене итлеме пулать. Акă, иртнĕ çулхи сентябрьтен пуçласа кăçалхи февральччен министерствăсен тематика эрнисем иртнĕ. Çавăн пекех кунта «Кĕр парнисем—2025» суту-илÿ ярмăркки, «Сывлăх тимлĕхре: хăвна тĕрĕсле» акци тата ытти мероприяти йĕркеленĕ.

Малалла муниципалитетсем хăйсен пурнăçĕпе паллаштараççĕ. Февралĕн 23-мĕшĕнчен пуçласа мартăн 1-мĕшĕччен Патăрьелсем агромаркетра «хуçаланĕç». «Пехетре» Юхмапа Пăла тăрăхĕнче çуралса ÿснисене тата ыттисене те хапăл тусах кĕтеççĕ.