Хĕллехи тапхăрта пушартан сыхă пулни уйрăмах пĕлтерĕшлĕ. Кăçал çулталăк пуçланнăранпа пилĕк пушара шута илнĕ. Вĕсенчен виçĕ тĕслĕхĕ мунча хутнă чухне асăрханусăр пулнипе çыхăннă, пĕр инкекĕ печка-прачкăпа пĕçернĕ вăхăтра пушар хăрушсăрлăх йĕркине пăхăнманран, тепри вара автомашина юсавсăр пулнăран техникăна вут хыпса илнĕ. Çак пăтăрмахсем пурте çын яваплăхĕпе, асăрханманлăхĕпе çыхăннă. Çавăнпа та мунча хутнă, лаçра е урамра вырнаçтарнă кăмакапа выльăх апачĕ пĕçернĕ чухне кăвайт çуннине сăнасах тăмалла. Акă, иртнĕ эрнере Çĕньялта тухнă пушар та мунча хутнă чухне тимлĕ пулманнипе çыхăннă. Юрать-ха, инкеке вăхăтра сиссе «01» службăна çийĕнчех шăнкăравланă.

Иртнĕ çул Патăрьел муниципалитет округĕнче 57 пушара, виçĕмçул 61 пушара шута илнĕ. Вут-çулăмпа çыхăннă инкексен сăлтавĕсем тĕрлĕрен: электропроводка юсавсăрри, электроприборсемпе усă курнă, кăмака хутнă чухне асăрханманни тата ытти те.

Андрей ТУКМАКОВ, Патăрьелĕнчи пушар надзорĕн начальникĕ