Унччен çырма-çатра, юхан шыв хĕррисемпе, çул айккисемпе лартнă посадкăсенче, вăрмансенче çÿп-çап куписем е ăпăр-тапăр тултарнă михĕсем туллиехчĕ. Ялсенче ятарлă контейнерсем вырнаçтарнă хыççăн йĕрке кĕме пуçларĕ. Халĕ ватти-вĕтти хуçалăхри хытă каяша ещчĕке кайса пăрахать. Шел пулин те, хушăран унта мĕн-мĕн пуррине курсан çÿç-пуç та вирелле тăрать.

Çуркунне хăрнă, каснă йывăç вуллисем, çулла пахчари курăк, кĕркунне хăяр-помидор аврисем, çĕрнĕ çĕр улмипе сухан-çевок, çавăн пекех кивелнĕ кресло-диван таран тултараççĕ. Кĕменнисене айккине лартса хăвараççĕ. Кăçалхи сентябрь уйăхĕнчи çĕнĕ йĕркепе контейнерсене тата вĕсен йĕри-тавра йывăçсем, ÿсен-тăран хума юрамасть. Пăхăнманнисене пуçран шăлмаççĕ, штраф параççĕ. Çÿп-çап пухмалли ятарлă лапам таса пуласси халăхран кăна мар, ăпăр-тапăра турттарса тухма килĕшÿ тунă организацинчен те килет. Пирĕн округра ку енĕпе «Полигон» пĕрлешÿ тăрăшать. Санитари йĕркипе тата нормипе килĕшÿллĕн çанталăк 5 градусран ăшăрах чухне контейнерсене кашни кунах пушатса тăмалла. Кулленех килсе илсе каймасан та, тулнăçем тирпейлесе тăрсан та аван. Хăш-пĕр чухне ещчĕксем çинчи япаласем тулса тăкăнаççĕ. Кун пек чухне акт çырса регионти оператора, урăхла каласан «Ситиматик-Чувашия» пĕрлешĕве пĕлтермелле.

Акă мĕн пĕлтерчĕ, кун пирки Патăрьел муниципалитет округĕн администрацийĕн экологĕ Кристина Тямина:

— Документа территори пайĕн специалисчĕсен пулăшăвĕпе (вĕсенче акт çырмалли йĕрке пур) ялта пурăнакансем хăйсемех çыраççĕ. Тĕслĕхе çирĕплетме сăн ÿкерчĕк е видео кирлĕ. Çавăн пекех 8(8352)70-90-27 номерпе шăнкăравласа, 89176502121 номер çине ватсаппа, вайберпа çырса яма май пур. Телеграм-каналта ЧР çут çанталăк ресурсĕсен тата экологи министерстви «Батырево взаимодействие» ушăн йĕркеленĕ, унта коммуналлă хытă каяшсемпе ĕçлекен регионти оператор та, çÿп-çапа турттаракан та, министерство представителĕсем те, территори пайĕн начальникĕсем те пур. Çак ушкăн урлă контейнерсене вăхăтра пушатманни пирки çулталăк пуçланнăранпа 33 хутчен ыйту çĕкленĕ: Алманчă территори пайĕ — 1, Пăлапуç Пашьел — 8, Пикшик — 7, Ыхра Çырми — 5, Сăкăт — 2, Турхан — 1, Çĕньял — 3, Шăнкăртам — 6.

Акт çырнă чухне çакна та асра тытмалла: контейнерта хытă каяш çеç пулмалла. Пахчари çум курăка е йывăç турачĕсене, çавăн пекех унта хума юраман япаласене пăрахнă пулсан шута илмеççĕ.

Ольга ПАВЛОВА