ПАТĂРЬЕЛ муниципалитет округĕнчи пушар надзорĕн начальникĕ Андрей Тукмаков хаçат редакцине пĕлтернĕ тăрăх ку таранччен мĕн пурĕ 52 пушара шута илнĕ. Вут-кăвар инкекĕпе çыхăннă кăтарту иртнĕ çулхипе пĕр танах. Юлашки кунсенче вара «01» служба сотрудникĕсен çине-çинех пушара хирĕç кĕрешме тивнĕ. Иртнĕ эрнекун ирхине 8 сехетсенче çăлавçăсен службине Шăнкăртамра вут алхасма пикенни пирки пĕлтернĕ. Кухньăран тухнă вут-çулăм çуртăн пĕр пайне тата унăн тăррине сиенленĕ.

Пĕр-икĕ кун маларах çеç вара каçхине 19 сехетре Нăрваш Шăхалĕнчи пĕр хушма хуçалăхран амаланса тухнă çулăм хăйсен хуралтисене çеç мар, кÿршисенне те сиеленĕ. Пушарсен сăлтавĕ пĕрешкел — электротехника юсавсăр пулни. Çавăнпа та çанталăк сивĕтсе пынă май, хутса ăшăтмалли приборсемпе, кăмакасемпе усă курнă чухне пурин те асăрхануллă та тимлĕ пулмалла, электросетьсене, проводкăсене пăхсах, çĕнетсех тăмалла.