ЮХМАПА Пăла тăрăхĕ çулсеренех çĕршывĕпех ирттерекен тĕрлĕрен акцие хастар хутшăнать. Акă, çак кунсенче çеç территори пайĕсем «Раççей шывĕ» акцие кар тăрса хăйсен территоринчи юханшыв, кÿлĕ таврашĕнчи çÿп-çапа, ăпăр-тапăра пуçтарнă. Ку тĕлĕшпе яланах Тăрăн территори пайĕ кăтартуллă ĕçлет. Хальхинче те вĕсем Чесновка çыран хĕррисене йĕри-таврах тасатса тирпейленĕ, çу каçа пуçтарăннă кĕленче, пластик савăтсене тата ыттине те пуçтарса çÿп-çап тăкмалли вырăна ăсатнă. Нăрваш Шăхаль территори пайĕ те кĕрхи уяр кунпа усă курса шыв таврашне тасатнă.