ПАТĂРЬЕЛ муниципалитет округĕн пуçлăхĕ Рудольф Селиванов администрацин структура подразделенийĕсен ертỹçисемпе, территори пайĕсен пуçлăхĕсемпе ирттернĕ черетлĕ канашлура тирпей-илемпе çыхăннă конкурса пĕтĕмлетнĕ май çак шухăша уйрăмах çивĕчлетрĕ. Конкурс итогĕпе, паллах, хăш-пĕр территори пайĕсенчен ырă тĕслĕх илмелли пур. Сăмахран, Алманчăсем иккĕмĕш хут умлă-хыçлă "Чи хăтлă ял" хисеплĕ ята алăран ямаççĕ. Нăрваш Шăхалĕнчи Пулевей урамĕнче пурăнакансем те иккĕмĕш хут конкурса хутшăнса чи-чи кăтартуллисен шутне кĕчĕç тата ытти те. Çав вăхăтрах муниципалитет округĕнчи 19 территори пайĕнчен тăххăрăшĕнче - Ишлĕ, Пикшик, Ыхра Çырми, Çĕнĕ Ахпỹрт, Первомайски, Шăхач, Туçа, Тăрăн, Шăнкăртам территори пайĕсенче - конкурсри пилĕк номинацинчен пĕринпе те хутшăнма тăрăшман.

Хальхи вăхăтра кашни ялтах хăйсен кил-çурт таврашне тирпейлĕ те хăтлă тытакансем, çурт умĕсенче, пахчара дендрари евĕр çеçке çитĕнтерекенсем сахал мар. Илеме тăвакансене, тавралăха хăтлăлатса ыттисемшĕн киленĕç кỹрекенсене курма та, вĕсене хавхалантарма та пĕлмеллех!