Çырлана шăнтса хурсан усăллăрах, пахалăхĕ çухалмасть теççĕ. Тăпăрчă пирки те çакна калама пулать-и? Тин татнă пахча çимĕçпе улма-çырлана шăнтса хурсан, чăн та, аванрах, мĕн пур усăллă япала сыхланса юлать. Шăнтнă тăпăрчăн пахалăхĕ вара самай чакать.

Тăварланă хăяр-помидора çисе ярсан банкăра шывĕ юлать. Хĕшĕ-пĕри унпа ним тума пĕлмесĕр тăкать çеç. Шел, унта шывпа тăварсăр, тип çупа уксуссăр пуçне пахча çимĕçрен тухнă усăллă ытти япала та нумай. Калăпăр, маринада крахмалпа е çăнăхпа пăтратса çатмара пĕçерсен тутлă соус пулать. Çавăн пекех тăвар шывне пиçекен яшкана яма, салата е ытти апата хушма юрать.

Йод е зеленка уçнă чухне алла варалас мар тесен резина пăкă çине пĕчĕк шуруп пăрса кĕртĕр.

Хĕллехи вăхăтра тимĕр çитменрен чечексем вăйсăрланаççĕ, шуралаççĕ. Шăвармалли шыва тутăхнă 2-3 е ытларах пăта ярса хурăр, кайран унпа шăварăр. Чечексем чĕрĕлĕç. Кишĕрпе çĕр улмине кастрюль е çатма çăвакан тимĕр мунчалапа лайăх çуса тасатсан вĕсене шуратма та кирлĕ мар.