ХУЛА хăтлăхĕн программипе тăвакан Патăрьелĕнчи кану паркĕ çулсеренех хăтлăланса, капăрланса пычĕ. Паркра паян утса çỹреме те, канса ларма та кăмăллă. Ачасем валли тĕрлĕрен чуччу, уйрăм лапам та пур. Аслисем те кунтах хăйсене валли чун киленĕçне тупма, тĕрлĕрен тренажер хатĕрĕпе хул-çурăмне тĕреклетме пултараççĕ. Округ центрĕнчи парк чăннипех хуларисенчен пĕрре те кая мар. Анчах çак илеме курма, хаклама пĕлменнисем кунти çутă юписенчи лампăчкăсене тăпăлтарса кăлараççĕ, капăр саксене йăвантараççĕ, шăпăрлансен ярăнмалли чуччуне тата ыттине те сĕмсĕррĕн çĕмĕреççĕ, ватаççĕ... Çакăн пек илеме нĕрсĕрлетме мĕнле аллисем çĕкленеççĕ-ши?