ХАЛЬХИ вăхăтра Патăрьелĕнче çеç мар, ытти ялта та çул çитмен ачасем питбайкпа транспорт е çынсем утакан çулпа вĕçтерсе çỹренине час-часах куратăн. Хăшĕсем хỹтĕлев шлемĕсĕрех руль умне теветкеленсе лараççĕ.

Аса илтеретпĕр: кросс мотоциклĕсем, питбайксем спорт инвентарĕ шутланаççĕ. Çавăнпа та вĕсемпе обществăлла çул-йĕр çинче ярăнма юраманнине пурин те асрах тытмалла. Унпа спорт трассисенче, хупă площадкăсенче, хирте е тренировка ирттермелли вырăнсенче çеç çỹремелле. Çăмăл техника хатĕрне регистрацилемеççĕ те. Çакă ачасемшĕн çул çинчи йĕркене пăсмалли сăлтав пулмалла мар. Питбайк инкек-синкек ан кăтарттăр тесен чăн малтанах ашшĕ-амăшĕн ăна çул çитмен ачана туянса памалла мар. Енчен вăл пур пулсан вара мĕнпур хăрушсăрлăх йĕркине çирĕп пăхăнмалла.