МУНИЦИПАЛИТЕТ округĕнчи пушар надзорĕн начальникĕ Андрей Тукмаков хаçат редакцине пĕлтернĕ тăрăх, хуçалăхра вут-кăвар алхаснин сăлтавĕсенчен пĕри - кивелнĕ электропăралук. Чылай чухне кил хуçисем ăна улăштарма васкаманран инкек сиксе тухать. Акă, юлашкинчен Упамсари пĕр хуçалăхри гаражран амаланма пуçланă пушарăн сăлтавĕ те çакăнпах çыхăннă. Вут-çулăмра хуралтисем çунса юрăхсăра тухнă, çуртăн тăрри те сиенленннĕ. Юрать-ха, кил хуçисем çурт-йĕрне инкек-синкекрен старахланă. Пысăк тăкака кăштах саплаштарма пулать темелле.

Çулталăк пуçланнăранпа муниципалитет округĕнчи ялсенче 8 пушар (пĕлтĕр 9) пулнă.

Апрелĕн 1-мĕшĕнчен Чăваш Енре пушар тухас хăрушлăх пысăк тапхăр пуçланать. Çак тапхăрта çынсен вут-кăвар инкек-синкекĕнчен асăрханмалли йĕркесене уйрăмах çирĕп пăхăнмалла.