ПАЯН Юхмапа Пăла тăрăхĕнче пурăнакансем май пур таран Украинăри ятарлă çар операцийĕнче çапăçакан салтаксене пулăшма, çĕнтерĕве çывхартма апат-çимĕçпе тĕрлĕрен ăшă тумтир ăсатаççĕ, хỹтĕлев сеткисем çыхаççĕ, çар пурнăçĕнче кирлĕ ытти ыйтусене татма та пулăшаççĕ. Çак кунсенче çеç Сăкăтри Анатолий Михайловичпа Нина Ивановна Каруковсен çемйи хăйсен ачисемпе Тăван çĕршывăн Аслă вăрçă участникĕн, юратнă ашшĕн, аслашшĕн пулнă УАЗ автомашинине юсаса, тирпейлесе Юрий Тинюков волонтер урлă çар операцийĕнчи салтаксем патне ăсатнă. "Пирĕн "хурçă ут" салтаксене çар пурнăçĕнче ытларах кирлĕ тесе шутлатпăр. Çемьешĕн пĕлтерĕшлĕ автомашина салтаксене усăллă ĕç тума пулăштăр", - тет çемье пуçлăхĕ. Сăмах май каласан, Каруковсен аслă ывăлĕ çар операцийĕ пуçланнăранпах унта хутшăннă, темиçе хутчен аманнă та. Халĕ сывлăхне çирĕплетет.