ÇУЛ çитмен ачасем мотоциклсемпе аварие çакланни, сусăрланни пирки сахал мар çыраççĕ, калаççĕ пулин те, ашшĕ-амăшĕ ачисене икĕ урапаллă техникăна туяннни, вĕсемпе кунĕпе те çĕрĕпе (çаплах калас килет) çỹреме ирĕк пани чăнах та тĕлĕнтерет. Çакскерсем хăрушсăрлăха, çул-йĕр правилине пăхăнса пуçне каска та тăхăнмаççĕ. Иккĕн-виççĕн тиеннĕ "байкерсем" Патăрьелĕнчи урамсемпе те çил пек вĕçтерсе çỹреççĕ. Вăрттăнрах кĕтесре вырнаçнă Гагарин урамĕ вара юлашки вăхăтра вĕрентỹ полигоннех çаврăннă темелле. 7-8 мотоциклист умлă-хыçлă вирхĕнтерсе çеç çỹреççĕ. Мухтанас текеннисем пĕр урапа çинче те ярăнаççĕ. Çаврăнса ỹкессе е пырса çапăнасса та шутламаççĕ. Каçхи шăплăха çурса çур çĕрчченех акатуй яраççĕ 14-15 çулсенчи арçын ачасем. Çынсене канма чăрмантарни пирки те шутламаççĕ, аслисем каланине вара хăлхана та чикмеççĕ... Кунта пурăнакансем йĕрке хуралĕн, çул-йĕр инспекцийĕн сотрудникĕсене рейдсем вăхăтĕнче Гагарин урамĕнче час-часах пулма, обществăлла йĕркене пăсакан ытти ачасемпе те калаçусем ирттерме ыйтаççĕ.