ИРТНĔ эрнекун районти пушар чаçĕн тата надзорĕн сотрудникĕсем икĕ хутчен те пушар сỹнтерме вас- канă. Ирхине Шăнкăртам урамĕнче çăмăл автомашинăна (пирĕн район çыннисем мар) вут хыпнă. Сăлтавĕ - электрооборудовани юсавсăр пулни. "Хурçă ут" йăлтах çунса юрăхсăра тухнă. Сăмах май каласан, кăçал çеç "01" службăра çакнашкал тăваттăмĕш тĕслĕхе шута илнĕ. Кăнтăрлахи апат хыççăн вара Патăрьелĕнчи Мичурин урамĕнчи мунчаран вут-çулăм алхасма пикеннĕ. Кил хуçи унта кипятильникпе шыв ăшăтма лартнă, хăй айккинелле пăрăннă. Юрать-ха, пушарниксем ытти сарай-хуралтăна хыпса илме паман.