КĂÇАЛ районти ялсенче халăх пĕр шухăшлă пулнипе, кар тăнипе сахал мар парахатарлă ĕç пурнăçланчĕ. Пĕрисен ырă тĕслĕхĕ теприсемшĕн хавхалантару пулни кăмăллă. Çакнашкал меслетпе çуркунне çеç мар, кĕркунне те чылай ял тăрăхĕнче масарсенче субботниксем йĕркелерĕç, хăрнă йывăçсене тасатрĕç, картисене юсарĕç тата ытти те. Çак кунсенче çеç Аслă Чемен ял тăрăхĕнче те масарсене халăх вăйĕпе тирпейленине шăнкăравласа пĕлтерчĕç. Юр çуса лартиччен кунта ял çыннисемпе пысăк ĕç туса ирттернĕ. Тури Туçари Зеленая урама та çак касра пурăнакансен мехелĕпех, харсăрлăхĕпех тикĕслесе вак чул сарнă. Ферма кассине (халăхра çапла калаççĕ) çитес çуркунне техникăпа кĕрсе-тухма маларахри пекех нуша пулмĕ.