ПАЯН ялсенче килсерен тенĕ пек çăмăл машина пур. Пĕрре çеç мар, иккĕ-виççĕ те. Тракторсен шучĕ те çуллен нумайланса пырать. Паллах, çакă савăнтарать, анчах çул-йĕр инкекĕсем пирки илтсен пăшăрхантарать те. Руль умне ларакансем правилăсене час-часах пăхăнмаççĕ, эрех ĕçнĕ хыççăн çула тухакансем те пур тата ытти те. Чăваш Енри шалти ĕçсен министерствин пресс-служби пĕлтернĕ тăрăх, сентябрĕн 16-мĕшĕнче "Калинино - Патăрьел - Елчĕк" автоçулăн участокĕнче 20 сехет тĕлнелле авари пулнă. ВАЗ-221124 автомашина кювета чăмнă. 53 çулти водитель çавăнтах вилнĕ, пассажирне больницăна илсе кайнă. Хальхи вăхăтра çул-йĕр инкекĕн сăлтавне уçăмлатаççĕ.

Кашни водителе, çула тухнă çынна килĕнче кĕтеççĕ, çавăнпа та асăрханулăх пирки манас марччĕ.