Пысăк тухăç илес тесен çĕр çырлине çуркуннерен пуçласа çу вĕçленичченех удобрени хывмалла. Сезон тапхăрĕнче ăна ултă хутчен апатлантармалла.

-Çулçи çитĕннĕ тапхăрта: 10 л шывра 1 чей кашăкĕ мочевина ирĕлтермелле, çĕр çырлине шăвармалла (1 тăвакал метра пĕр витре шĕвек).

- Чечеке ларас умĕн: 10 л шывра 2 г биопрепарат (иммуноцитофит) ирĕлтермелле, ỹсен-тăрана сирпĕтмелле.

-Чечекленме тытăнсан: 10 л шывра 1 апат кашăкĕ нитрофоска удобрени ирĕлтермелле, йăрана сапмалла: 1 тăваткал метра пĕр витре кирлĕ.

-Тепĕр кунне 10 л шывра пĕр чĕптĕм бор йỹçĕкĕ тата пăхăр купоросĕ ирĕлтермелле, 30 тумлам йод хушмалла. Çулçăпа тăпрана йĕпетмелле, ун хыççăн тăпра çине кĕл сапмалла.

- Çырла пуçтарса илнĕ хыççăн: 10 л шывра 100 г çĕпре ирĕлтермелле, тĕмме сирпĕтмелле.

Фитофтора

Кашни икĕ эрнере помидора сĕтпе йод шĕвекĕпе сирпĕтмелле: 10 л шыва 1 л сĕт, 15 тумлам йод хутăштармалла. Шĕвекпе ỹсен-тăрана лайăх йĕпетсе шăвармалла.