ИРТНĔ эрнере районти суд приставĕн уйрăмĕн тата район полицийĕн сотрудникĕсем "Хăвăн парăмна пĕлетĕн-и?" акцие хутшăнса пĕрлехи рейда тухнă. Тĕрĕслевĕн тĕп тĕллевĕ - граждансене хăйсен парăмĕсем пирки аса илтересси, вĕсене тỹлеттересси. Рейд вăхăтĕнче Патăрьелĕнчи "Юхма" пасар территорийĕнче çỹренĕ тата Шăнкăртам ял тăрăхне çитнĕ. Тĕрĕслев йĕрсĕр иртмен. Патăрьел тата Шăмăршă районĕсен суд приставĕн уйрăмĕн начальникĕ Галина Афки хаçат редакцине пĕлтернĕ тăрăх, акци тапхăрĕнче 29 гражданинран ГИБДД штрафне (210 пин тенкĕ), 27-шĕнчен налук парăмне (231 пин тенкĕ) шыраса илнĕ. Унсăр пуçне пысăк парăмсемшĕнех виçĕ предпринимателĕн 417 пин тенкĕлĕх пурлăхне арестленĕ.