ВЫРСАРНИКУН, ака уйăхĕн 28-мĕшĕнче, православи тĕн йăлине тытса пыракансемшĕн пысăк праçник _ Мăнкун е Христос Чĕрĕлсе тăнă кун. Çак кун Иисус Христос вилĕмрен мухтавлăн чĕрĕлсе тăрса пĕтĕм тĕнчене çылăх тыткăнĕнчен хăтарнă, этемлĕхе телейлĕ ĕмĕрлĕх парнеленĕ. Мăнкун кĕлли çĕрле вуникĕ сехетре пуçланать. Ун чухне священниксем те, Турра ĕненекенсем те çутă тумтир тăхăнаççĕ. Праçнике хатĕрленсе çынсем сĕтел çине чăн малтан илемлетнĕ çăмартасене, пире çăлаканăмăр, хỹтĕлекенĕмĕр Иисус Христос килнине палăртакан Мăнкун куличне лартаç.