МĔН çамрăкранпах (34 çул) "Елчĕк ен" хаçат редакцийĕнче тăрăшакан Валентина Кириллова (Тимĕр Алюш Вали) журналиста пирĕн хаçат вулаканĕсем пурте пĕлсех каймаççĕ пулин те унăн повеçĕсемпе калавĕсене ас тăваççĕ-тăр. Вĕсем пирĕн хаçат страницисенче те сахал мар пичетленнĕ. Хаçат ĕçченĕ ĕçри тивĕçне пурнăçланипе пĕрлех кĕнекесем калăплама та вăхăт тупать. Çак кунсенче çеç унăн виççĕмĕш кĕнеки _ "Сас пачĕ чĕрĕ чун" - кун çути курчĕ. Республикăра "Вулавăша кĕнеке парнеле" акци пынă май, автор черетлĕ "чун апатне" Елчĕк районĕнчи библиотекăна çеç мар, Патăрьелсене те парнелесшĕн. Апла пулсан типографи шăрши те сĕвĕрĕлсе пĕтмен илемлĕ хуплашкаллă кĕнекене эсир те алла тытса вулама, хак пама пултаратăр.