АСЛĂ ЧЕМЕНТИ вăтам шкулта ачасене акăлчан чĕлхин вăрттăнлăхне вĕрентекен Надежда Кошелева кашни çулах районти е республикăри тĕрлĕрен конкурса хутшăнса палăрать. Пуçаруллă та пултаруллă учительница вăхăта усăсăр сая яма юратмасть. Тĕп ĕçĕ ют чĕлхепе çыхăннă пулин те Надежда Васильевна тăван чĕлхепе йĕркелекен тупăшусене те хастар хутшăнать. Çак кунсенче çеç Чăваш Республикинчи вĕрентỹ институчĕ "Чăвашла уяв янратăр" сценари конкурсне пĕтĕмлетнĕ. 110 ĕçрен пирĕн ентешĕмĕрĕн творчествине жюри пысăка хурса хакланă, призерсен йышне кĕртнĕ. Тĕпрен илсен, автор материалта пĕлтĕр кун çути курнă "Вĕсем Çĕнтерĕве çывхартнă" хăйĕн кĕнекипе усă курнă. Н. Кошелева _ "Авангард" хаçатăн хастар обществăлла корреспонденчĕ те.