ЮРĂ-КĔВĔ çыннăн кăмăлне çĕклет, хавхалантарать çеç мар, пурăнма та вăй-хăват хушать. Нумай пулмасть Кĕçĕн Арапуçĕнчи клубра тĕп хуламăртан килнĕ юрăçсем ял халăхне чылай вăхăтлăх хавхалану парса хăварнине хĕпĕртесе пĕлтерчĕ хаçатăн обществăлла корреспонденчĕ Василий Селиванов. Чăваш Республикин паллă артистки Людмила Семенова ерсе пыракан ушкăн куракансене икĕ сехете яхăн хăйсен юрри-кĕввипе тыткăнланă. Вĕсем хушшинче хамăрăн ентешĕмĕрсем, Александр Сорокинпа Алексей Казанцев, пулни çынсене пушшех те хавхалантарнă. Алина Акăшпи сĕрме купăспа каланине куçпа курни те ватти-вĕттишĕн чылайлăха асра юлĕ. Вĕсем шăрантаракан кашни юрă хыççăн тăвăллăн алă çупни те çакнах çирĕплетсе панă.